2009.12.05.des. 041

Planane er klare. Pengane er klare. No gler vi oss til klarsignal for brua. Vi er klare.

Folk frå begge sider av Dalsfjorden møttest på ferjekaia i Dale for å feire og glede seg til at no kjem klarsignalet for brua i fylkestinget.

Studentane i Bergen hadde samling ved den Blå steinen i Bergen sist laurdag med fotodokumentasjon i avisene. Namn på studentane i Bergen finn du HER

Aksjon Dalsfjordbru ville spreie litt glede og optimisme denne desemberdagen. Her var mannskor med Dalsfjordsong. Her var tid til klemming og forteljing og taler og allsong.
Så vert det fest kvar laurdag no framover?

Her var fotografering og filming. Pressa var til stades, så med tida kan du lese meir.

Men Aksjon Dalsfjordbru hadde gløymt brudansen. Kva er det de tenkjer på? Neste gong må de i det minste invitere Torsdagsdansen og Danseverkstaden til kulturskulen og leikarringen i Holmedal. Med “Øyarikets vals” og “Rock on the Bridge” hadde det bltt endå meir fart og varme i desemberfesten!

Du kan få vite mykje meir her, Dalsfjordbrua

5.12.2009.
Asbjørn Eikerol.

“Dalsfjorden” – Her er teksten.

Mange likte songen “Dalsfjorden” og koret Brukarkoret som song under folkemønstringa i Dale i dag. Her finn de teksten.
Publisert 05.12.2009 av Tor Egil Furevikstrand

DALSFJORDEN
Tekst og melodi: Sigvard Sørebø Skaar

Eg sit ofte her og drøymer, attmed fjorden min
- takkar titt Vårherre, som gjorde fjorden fin
Eg eig ein flik av deg, Dalsfjord, lang og lun
./.Vikjer, skjer og holmar; Dalsfjordfjell og Dalsfjordtun./.

Dalsfjord; du er vakker, kvar ein solskinsdag
Ein Herrens oase, langt unna storbyjag
Kringsett av grøne lier; du speglar himmel blå
Og nærare ein himmel er det vanskeleg å nå

Eg har sett deg rasande; gå jagande og stri
Du kastar deg mot land og fjell, i drivkvitt raseri
Men julinatta ligg du klår, varm og mørkeblå
Ung og blyg og lengtande, med sommarkjole på

Frå ferskvatn i Gaula til Bulandet og salt
Du ber i deg heilskapen, fjord; du femner alt
Ved Ottersteinen er det blåkval og havets sølv
Det har eg etter Daniel, han hadde sett det sjølv

Bestefar min rodde fjorden for å fri
Han sa at nordsidejenter er lette å bli glad i
Han var slett ikkje åleine, slik ein friardreng
Båtar kryssa Dalsfjorden med friarfolk i fleng

Eg sit ofte her og drøymer, attmed fjorden min
- takkar titt Vårherre, han gjorde vatn om til vin
Eg eig ein flik av deg, Dalsfjord lang og lun
Vikjer, skjer og holmar; Dalsfjordfjell og Dalsfjordtun

Tillegg – Til Skandalemarsjen 2000:

Du fjord som eingong samla, du skil gamle brør
Du held oss frå kvarandre, og broderskapet blør
Før batt du oss saman, folk frå nord og sør
Og vi treng kvarandre kanskje meire no enn før

Det du Vårherre gløymde i ditt meisterverk;
var å ferdigstille fjorden før du fòr heim til Hermansverk
Lat oss leve her vi ynskjer, det er vår bøn i dag
./.vi treng ei bru så folk kan bu ved Dalsfjorden i lag./.

Brukarkoret:
Sigbjørn Skogly – Bendik Vik – Normann Vik – Leif Arne Skaar – Andreas Ramstad – Jørgen Alisøy – Jarle Nedrebø – Ove Losnegård – Sigvard Sørebø Skaar

2009.12.05.des. 018 — Her var mange som skulle ta ferja frå Dale i dag??

2009.12.05.des. 020 — Fleire folk kjem til etter som klokka går mot eitt.

2009.12.05.des. 022 — Nede ved ferja står to karar og planlegg noko.

2009.12.05.des. 023 — Og her er Oddmund R. Haugen med filmkamera. Dette skal dokumenterast.

2009.12.05.des. 024 — Nokre songarar har samla seg. Skal her vere songarstemne i desember?

2009.12.05.des. 025 — Den femte desember 2009. Klokka eitt. Då Aksjon Dalsfjordbru heldt fest i Dale.

2009.12.05.des. 027 — Ja, her er det mannskoret som stemmer i med brusong av Sigvard S. Skaar.

2009.12.05.des. 028 — Andreas Ramstad på trekkspel.

2009.12.05.des. 030 — Så kjem Rolf Kleiven på talarstolen, eller lasteplanet.

2009.12.05.des. 032 — Rolf fortel alle om ein glad dag og no blir det feiring for Dalsfjordbru.

2009.12.05.des. 033 — Rolf er så glad at han bed alle frammøtte klemme så mange som råd. Klemmetid på kaia i Dale. Mange klemde, men somme vart litt flaue. Ja sjølv ferja rødma litt i skorsteinen, ser vi.

2009.12.05.des. 034 — Så fortel han meir om soga til Dalsfjordbrua, eller mest om framtida med alt som vil skje når brua er på plass. Og det er gledelege meldingar ser vi på dei blide ansikta.

2009.12.05.des. 035 — Og han fortel til folket. No lysnar det i Dalsfjorden. Det er nesten så det grønkar i liene i desember. Og snart kjem Ålsundbru, Atløybru, Sognebru, og han nemner til og med Olden – Innvik, Aksjonskomitèen har arbeid og planar framover.

2009.12.05.des. 038 — Heilt til Rolf Losnegård tek over mikrofonen.

2009.12.05.des. 040 — “Vi har førebudd fine plakatar”, fortel Rolf.

2009.12.05.des. 042 — “Så må de gå hit eller dit så de tek dykk godt ut,” seier Rolf Losnegård. Han dirigerer folk og plakatar.

2009.12.05.des. 043 — Og så vil fotografane vere med og flytte på folk.

2009.12.05.des. 046 — “Eg vil no lese kva som står på plakaten!”

2009.12.05.des. 044 — No ser det fint ut. Smiiil!

2009.12.05.des. 045 — “Moroa er ikkje heilt slutt enno. No skal vi gå ein og ein halv skofabrikk mot aust, langs fjorden,” ropar Rolf Losnegård og peikar med armane.

2009.12.05.des. 049 — Her var det meir filming og foto frå balkongen. Marianne Furevikstrand fortalde at ho skal skrive bok om Dalsfjordbrua.
Ordførar Arve Helle heldt tale. Så var det allsong.

Etterpå fekk vi gå på kafè.

dalsfjordbrua blaastein1¹ — 67 studentar fotografert på den Blå steinen i Bergen. 28.11.2009. Dei gratulerer framtidsfylket med Dalsfjordbru.
Klikk på bildet.
Foto. Oddmund R. Haugen.